Her blir ein person ståande i midten som «haien» , medan resten deler seg inn i grupper, og stiller seg gruppevis rundt haien. Det kan vere greit å merke området der gruppene står! Før leiken byrjar finn gruppene navn på kva/kven dei er. Dette kan vere fiskenavn, dyrenavn osv alt etter kva ein ønskjer. Leiken går ut på at «haien» står i midten og ropar ut laga etter tur, og så skal dei «symje» rundt haien. Når dei har symt rundt ei stund ropar haien: «HAIEN KJEM» og då må alle springe heim til plassen sin før haien klarar å fange nokon. Dei som blir tekne vert og haiar, og hjelper til med å fange fleire neste runde. Etter kvart som fleire og fleire blir tekne, er det vanskelegare for dei som er att å kome seg heim før haiane tek dei.

Dersom det er mange deltakarar kan det vere lurt å utvide leikeområdet. Det kan gjere at deltakarane ikkje spring oppå kvarandre og at det heile får ein betre flyt. Varier retninga fiskane må symje rundt haifeltet. Hugs å ha gruppene sin «heim» tydeleg merkt slik at det ikkje blir diskusjon på om ein er komen heim eller ikkje når haien kjem.